Sam(左)及 Mike認為 Timable採用一條 Timeline夠方便,只要在 Timeline上一 click就會出現該日期內的文娛活動、節目及購物優惠。

創業通

早出過 facebook  Timable用 Timeline發圍

「嚟緊父親節有乜好節目?」都市人平時放假最怕搵節目,但只要上 Timable網頁,各大小文娛節目、節慶活動的舉辦日期都一目了然。 Timable由兩個 80後大男孩 Mike和 Sam創立,他們比 facebook更早推出 Timeline功能,收錄城中各大小活動, Timable的方便,竟吸引香港 Yahoo找他們合作,大大提升了知名度,並令其 facebook fans激增至 4萬人,以此人氣 call客落廣告,月賺 2萬元。

早在 Facebook未推出 Timeline版,網站 Timable 09年已使用 Timeline功能,讓用家快捷地搜尋出想要的活動日期及時間。問老闆 Sam可會自覺早有潮流觸覺,他謙虛說:「我哋只係從用家角度出發,好多時唔想輸入咁多嘢,一 click就 search到想要嘅嘢,所以先諗到用時間線,其實我哋初初係 2條,一條係日子,一條係時間,後來發覺都係嫌太慢,一條過方便啲, ratio方面你可以選擇用年、月、日、時嚟計算。」在網站內,用家還可以透過分類、地圖及最新等模式來搜尋每日不同節目及活動。
說到這裏,很多讀者可能還未知 Timable是什麼?其實這個概念像在雜誌《 Ketchup》內有專欄叫 ComingUP,列出了當月的免費藝術展,而 Timable網頁內就更全面,列出由 09年尾開業時至 2013年 6月(未來一年內)有什麼活動及節目,包括話劇、演唱會及展覽等能登上 Timable嘅節目內容,最基本有該活動嘅開始及結束時段,好似某信用咭提供買戲飛有 9折,如果有時限,就唔會登落網頁度。

力拒打手廣告宣傳

網站內可使用事曆表式找尋活動。

另一老闆 Mike負責內容編寫,他說最怕網絡打手,因為浪費了他們很多時間,「最初大部分節目及活動資料,都係靠我哋上網同睇報紙雜誌搵返嚟,我哋試過開放平台畀 fans自己輸入,每日接到 fans提供嘅 50至 100個活動,但慢慢發現有三分二係離題,純賣廣告,好似有啲只係推廣某啲新產品,覺得濫用咗個功能,所以家 fans輸入後,我哋會先篩選過先會登出。」
Mike和 Sam本是中學同學,其後分別到科大及港大修讀電腦, 03年畢業後 Mike從事物流行業,做倉務管理,而 Sam則任職網絡工程人員。兩個中學老死好想創業,每逢週末都相約飲咖啡聚會,「我哋覺得成日搵節目好煩,如果有網頁可以 show晒全香港有咩節目或活動,應該會好吸引。」 09年時,二人合資 1萬創業,「最初我哋放工返屋企就做 Timable,阿 Sam主要設計網站,我就搵活動資,網站喺 10年月中面世。」

欠知名度勁難 sell客

用家 Oliver
我好鍾意睇音樂 show, Timable都幾齊,而且我有朋友喺啲 cafe搞小型音樂會,我幫佢上載活動到 timable,都有反應,而且 check到有幾多人 click過入去睇資料,免費宣傳幾好呀。

Mike表示並沒做過什麼特別宣傳,主要透過 facebook,及在一些討論區買 banner廣告;因 Sam懂寫程式,在搜尋器輸入演唱會, Timable就會出現在頭三甲位置。「喺 10年初我哋試過用 Timable個 concept,參加 google舉辦 10嘅 100次方計劃比賽,結果落選。其實我哋都去過好多機構 sell Timable,叫佢哋畀錢幫佢哋做宣傳,例如 high light佢哋嘅活動,將佢哋排列最前,又或者喺我哋 facebook幫佢哋宣傳,最初好多人都唔知 Timable係咩,當然會 turn down我哋啦。」
因為力拒打手,內容實用, Timable只推出半年,至 10年尾, facebook已累積 1萬個 fans,當時有被公關公司及機構留意到,並主動發新聞稿給他們,預告有什麼活動將舉行,大大減低了 Mike的工作負擔。
於 12年初,可說是 Timable的轉捩點,他們獲 Yahoo邀請合作,將 Timable功能增加到 Yahoo網站,「原來佢哋每年都有請實習生,並要求實習生提議 Yahoo可以有咩發展,其中一隊就 sell Timable,結果 Yahoo真係搵我哋合作,原因係我哋節目活動資料比佢哋完整,不過喺 Yahoo見到 Timable嘅版本同我哋個網站有啲出入, Yahoo自己本身有旅遊、飲食、團購網,所以有關分類唔會喺 Yahoo版本見到。」

與 Yahoo合作賺知名度

香港 Yahoo高級公關經理 Lisa
同 Timable合作,既可引入更多有趣內容到 Yahoo,另一目的係幫助本地年輕人發展事業。

Mike說不便透露更多與 Yahoo合作詳情,例如金錢上及合作年期等,但這次合作不計金錢數目,已令 Timable嫌了好多,「只計 facebook fans人數已經多咗 3萬,喺今年 4月開始,香港 Yahoo首頁都會見到 Timable個 icon,即刻多咗好多人識我哋!我哋家用 4萬 facebook fans去傾廣告、宣傳計劃,好多機構都願意一試。」
Timable網站本身亦有 banner廣告,從前是用 google的,自與 Yahoo合作後,便由 Yahoo提供,這部分收入每月約 4、 5千,「其實呢啲廣告位長期排係版面嘅右面,阻咗好多內容位,將來收入穩定啲,寧願唔賣呢啲廣告。我哋可以靠其他收入嚟維持個網,好似活動嘅擺位位置,其實你唔畀錢我都會放你嘅活動落網頁,但一日可能有成幾十個活動,排成 4、 5版,想用家一到嗰日就見到你嘅活動,就可以畀錢,每日收費$200起,想拉大啲張相吸引人注意都係收$200起。」

配合 fb收費宣傳

Mike說另一收入來源是配合 facebook宣傳,「我哋 facebook有成 4萬 fans,係好好嘅籌碼,每個宣傳活動收$2,000起,將客戶嘅活動放喺我哋 facebook上,而且仲會詳細介紹,好似鄧健泓、譚偉權主演嘅《大酒店有個荷李活》舞台劇,我仲走埋去影相做專訪,內容放喺 facebook及網站上,遲啲我哋想發展到有得網上即時賣埋飛。」
現在多了好多機構主動找 Timable洽談宣傳工作, Mike說之前將軍澳墳場大路開通,亦找他們做宣傳,「起初都有啲愕然,諗咗幾日點喺 Timable同 facebook上寫,結果引用咗 Eason首歌歌名『路一直都在』嚟宣傳,迎合到我哋 fans口味,因為大部分嘅 fans年齡層都係 20至 35年青人。」

Timable去年成立 1周年時,搞了一個慶祝活動,邀請 fans出席,使他們有歸屬感,亦希望透過活動吸納意見。

他們有時會收到 fans送的小禮物,表示網站受到用家歡迎。

Timable的構思因 Sam及 Mike每星期飲咖啡聚會而起,現時他們仍常到咖啡店歎咖啡。

在眾多活動中,他們發現最多人搜尋是演唱會,將來他們會設計個人化的 Timable,記錄用家慣常找尋的類別,每次登入都列出其喜好,更 user friendly及令人有歸屬感。「家網站用戶有 6成係女性,除舞台劇、演唱會外,最愛搜尋減價活動,之前 Timable都刊登過團購消息,但由於太多,及部分時間太長,所以家都會揀合作夥伴嚟刊登。」
說到未來發展,二人異口同聲希望能衝出香港,發展中國、新加坡、日本、韓國等版本的 Timable,「年初我哋申請到數碼港培育計劃基金,可以 2年免費租用數碼港 office,又有技術支援及資助,於是辭工瞓身做,屋企人都好支持。嚟緊會試多啲新嘢,今年暑假我哋會有 iPhone app推出。其實 facebook嘅 event page都好弱,如果搵我哋合作,當然 welcome!」

Timable提供全套宣傳服務,如採訪《大酒店有個荷李活》舞台劇的台前幕後人員,包括演員鄧健泓(右一)及譚偉權(右二),將內容上載到 facebook及 Timable網站,把他們的活動列為當日首頁出現,還提供大量相關圖片吸引用戶瀏覽,收費$2,000起。

創業成本

雜費:$10,000(網站 server租用、電腦)
總投資:$10,000

每月收支

租金: 0(數碼港培育計劃基金資助)
人工:$20,000(老闆 2人)
雜費:$5,000
營業額:$45,000
盈利:約$20,000

Timable
網址: http://www.timable.com

數碼港培育計劃

因參加了數碼港培育計劃, Sam及 Mike可免費租用 2年數碼港辦公室。

計劃為受培育公司提供先進設施、業務發展支援,以及企業管理和技術培訓,以支持香港資料及通訊行業發展。成功申請者將於 24個月內,獲發高達港幣 53萬元津貼資助,其中包括 2年免費租用數碼港寫字樓。 Mike表示數碼港會提供不同類型講座,幫助他們業務發展,例如市場推廣、法律等,他將會申請 50%薪金津貼去請應屆的畢業生來實習。

申請方法

申請要求:註冊公司、有 1年資金運作、業務有創意及與數碼科技相關
計劃內容:分為駐場、非駐場及海外資助 3款,資助金額由 3萬至 53萬元不等,駐場公司可獲免費租用數碼港寫字樓,另有業務發展支援、資助請實習生及顧問等。
查詢: http://www.cyberport.hk

撰文:陸伊琳
攝影:彭自維
部分圖片由被訪者提供