Dante 21歲
香港大學電腦科學系 Yr.1
aftership沒有自己的辦公室,寄居於拍檔 Teddy的辦公室。其實他們好多時各自在家及 cafe工作。

U撈

港大生做科技公司老闆 每日瞓得 4個鐘

讀大學做兼職,全因想自己多點零用,可以去玩花錢。但 Dante的大學生涯卻忙碌得多,完全沒有多餘時間去玩,全因他另一個角色是科技公司的老闆,他與拍檔合作發展 aftership程式,這個追蹤包裹服務已邁向國際,被 eBay、 amazon商戶使用。現時除了上堂做功課外, Dante便回宿舍取爭時間工作,每日只睡 4小時,專心發展自己的事業。

aftership提供一個介面讓商戶知道包裹送遞情況及透過電郵或 SMS通知客戶。

今年剛到港大修讀電腦的 Dante,同時是科技公司的老闆,他正努力學習怎樣分配時間,連去 O'camp也要 2位拍檔批准,全因怕他掛住玩,無心工作,「其實我帶咗電腦入 camp,玩咗成日,同學仔去瞓,我就開始做 aftership嘅嘢,每日瞓得 3、 4個鐘。」
拍檔 Andrew也是港大畢業,深知宿舍生活多姿多采,難免失控,故再次提醒:「你瞓咁少點得㗎,你就係唔識分配時間,人哋去食糖水、吹水,你少啲去咪得囉!」雖然大學生活忙碌,但 Dante身為老闆之一,十分尊重 Andrew及 Teddy的意見,「佢哋年紀比我大、經驗又比我多,所以我會喺工作同學業之間取得協調,真係要少啲去蒲。」
3人之所以走在一起創業,源於去年他們參加了首次在港舉行的「創業周末」全球比賽, 54小時內自由組隊並交出作品, Teddy本身在網上銷售模型,因而想出 aftership這個追蹤包裹運送應用程式, aftership現時已支援全球超過四十多間快遞公司的包裹追蹤號碼,商戶可於同一介面查看所有包裹的最新運送情況,並透過電郵或 SMS通知買家。

成為冠軍因而創業

「我哋唔單只擊敗咗 48個對手,喺香港奪冠,之後更同全球 50個有舉辦呢個比賽嘅冠軍比併,經網上投票後,亦以高票成為全球總冠軍。」 Andrew更辭去本身的 marketing工作,與他們一起創業。
Dante表示與 Teddy開發程式面對問題不太大,相反要花很多時間去做售後服務,例如每日要去上網解答用戶的疑難。
「搵客同宣傳,主要由 Andrew負責,我哋去 ebay、 shopify賣廣告,由於競爭對手唔多,加上我哋只收 15美元包 500件包裹追蹤,好快吸引到 ebay、 amazon等用戶幫襯,今年 3月推出至今已有千幾個用戶,至今個月已發出近 20萬個包裹追蹤訊息,期望年尾達 100萬個訊息。」

Dante與 Partner研發 aftership包裹追蹤程式,支援全球超過四十多間快遞公司的包裹追蹤號碼,主攻歐美市場。

去矽谷交流開眼界

Dante(後排中)之前修讀副學士時考獲 3.9GPA,成功考入港大,初嘗大學生生活,圖為他參加 O'camp時攝。

因為勝出比賽,年初時他們 3人獲邀去矽谷交流,眼界大開,「我哋聽咗好多 talk,又接觸到好多叻嘅人,好似同 dropbox嘅代表傾過偈。席間都有人有興趣投資 aftership,不過我哋考慮自主權問題,所以傾唔成。但到新加坡嘅創業展覽,認識到一間澳洲投資公司,佢向我哋購入 5%股份,價錢唔方便透露,佢哋唔會理我哋點搞,所以先同佢合作,不過我哋每人都出緊 1萬蚊人工,公司未算賺到大錢。」
雖然學校不是太多同學知道 Dante的另一個身份,但有不少大學、機構都找他們來分享創業故事,「通常都係 Andrew做代表,有時學校要求我去, Andrew就教我點講,有次演講到答問環節,因為我太緊張,詞不達意,事後得到兩位拍檔提醒,先識得改進。做咗老闆後,唔只令我眼界大開,更學習到同人溝通嘅技巧。」
至於科技方面, Dante認為暫時在學校學到的好有限,都要靠上網自學,「我成日上 Hacker News網,去睇最新嘅資訊,好似解構 iOS 6等。」

成功申請創業基金

因勝出「創業周末」全球比賽冠軍, Dante與拍檔 Andrew(右二)及 Teddy(左一)獲得去美國交流的機會,圖中的女士是當地的顧問,提供美國市場情報,他們亦給予她 1%股份作為酬勞。

他們於今個暑假成功申請了數碼港培育計劃,最多可達 33萬元資助,「創業嗰 20萬資金由 Teddy出,之前去外國交流部分錢都要自己出,有咗資助,我哋可以去多啲交流會,而且可以請顧問幫手,例如諮詢法律意見等,家我哋集中提供 B to B(商務層面)服務,時機成熟先發展為 B to C(消費者層面)。」
年紀小小的 Dante身兼兩職,自言不怕壓力大,反而學識自律及分配時間才最重要。「家放學返到宿舍就做 6、 7個鐘頭嘢,星期六日都要開工,每日瞓得 4個鐘咋,不過等遲啲公司上咗軌道,可以請多啲人幫手,到時就多啲自己私人時間。」

咩係「創業周末」全球比賽?

「創業周末」全球比賽是始於 06年在美國西雅圖首辦,鼓勵參加者 54小時內極速創業,從構思、尋找夥伴到投資者。主辦單位先選出分區優勝者,繼而全球選出冠軍,可到三藩市參加著名「 Launch Conference」向矽谷投資者推銷創業概念,開始創業夢。
Dante說:「場內每個人未必互相認識,大家都有唔同技能,好似 Andrew強喺 business、 marketing方面;而我同 Teddy就強喺寫程式,你可以喺場內 sell你條橋,睇吓有冇人 buy你,你亦可以去招攬人才, Teddy係第一個埋嚟問我有冇興趣合作, Andrew同我覺得條橋 work,人哋成十幾人一組,我哋得 3個人,最後竟然由我哋勝出!」

網址: http://www.startupweekend.org

撰文:陸伊琳
攝影:傅新發
部分圖片由被訪者提供