Alan 23歲
嶺南大學輔導及心理學 Yr.4

現時 Alan投放不少時間在 saxophone上,希望為推廣 saxophone出一分力,「自己最鍾意〈 Misty〉,覺得個旋律好優美,平日放學會去教班,堂與堂之間有時間就會練吓 saxophone。」

U撈

吹 saxophone先至型!

教樂器是不錯的學生兼職,教 saxophone可說是非常小眾,除當年電視劇《壹號皇庭》的片頭音樂〈 Your Latest Trick〉曾掀起過熱潮外,現時接觸 saxophone的人並不多。嶺大學生 Alan認為 saxophone不止音色吸引,吹奏時更十分有型,故愛上這門樂器。他現為兼職 saxophone導師,希望感染更多人愛上 saxophone。

Olivier學員
我係法國人,喺香港工作,細個有學過 saxophone,大過之後想學番。覺得 Alan好有耐性,自己年紀大咗,手指唔太靈活,佢都好用心教我。佢有時會教啲有趣嘅歌譜,好似〈新不了情〉,令我好有驚喜。

Alan表示除了教導學員音樂上的知識外,最好能帶動學員對 saxophone的興趣,「對有興趣嘅事情,學起上嚟會事半功倍。」

就讀嶺南大學輔導及心理學的 Alan,是一位兼職 saxophone導師,他愛上 saxophone,全因它的音色及外形均非常吸引,「讀小學學鋼琴,升上中學時,自己想搵多樣嘢去學,嗰期興 Kenny G,又諗起電視劇入面啲角色吹 saxophone幾特別,音色好優美,加上吹奏時幾有型,就決定報班學 saxophone。」
學藝 10年, Alan對 saxophone的熱情不減反增,「鋼琴學到中五冇再學,反而對 saxophone愈嚟愈有興趣,除咗練習升級試外,仲會研究 saxophone嘅相關知識,好似發源地、點解要咁吹、𠵱家邊啲地方流行等。」

冧另一半變興趣

上年 4月, Alan正式成為「音樂堂」的兼職導師,他表示能帶動學生的學習興趣最令他有成就感,「學生嚟學 saxophone嘅理由都唔同,有啲係想培養一項技能;有啲可能只係為學吹一首歌,用嚟求婚或者畀另一半驚喜。教過一名只想學吹一首歌嘅學生,隔咗一排佢發現自己對 saxophone好有興趣,返嚟上堂想認真學點吹,覺得感染到一個人鍾意自己鍾意嘅嘢,真係好開心。」
現時 Alan每星期教 4至 5晚 saxophone月入約$10,000,「最難係同時教幾個學生,佢哋一齊吹嗰陣,你要分到邊個吹錯咗,最初要逐個行埋去聽先分到,到𠵱家累積到一定經驗,可以同時分辨到 3、 4個人。除咗考試要練習嘅譜外,中間都要穿插教佢哋想學吹嘅歌,好似電影 background music、流行曲等,令學習過程唔好咁枯燥。」

今年 3月, Alan代表「音樂堂」出席大埔青年藝術節,上台表演吹奏 saxophone。

每次吹奏完, Alan都會做好 saxophone的清潔工作。

參加公開表演

教 saxophone亦令 Alan得到不少表演機會,是一些不錯的體驗,「教 saxophone會安排喺上堂以外嘅時間,對學業影響唔大。『音樂堂』有時會同商場或者團體合作,好似喺工展會、藝術節等會有公開表演,自己都會踴躍參加。在台上表演時覺得幾有型!兼聽到觀眾叫 encore,個滿足感好大。」
還有數個月便畢業的 Alan,希望可以同時發展輔導及音樂工作,「對音樂方面比較有興趣,畢業後會繼續教 saxophone,我都會搵有關輔導方面嘅工作,仲打算讀音樂治療方面嘅課程,不過都要等畢業後先再作決定。」

點入行?

音樂堂業務總監 Jacky表示:「可以向我哋自薦做導師,最低要求係 saxophone 8級程度,之後我哋會安排佢做 8堂助手,留意佢與學生嘅溝通能力,有冇心做,之後就會決定錄唔錄用,啱啱入行嘅導師時薪約$50至$80。」

查詢︰
2380 7321

撰文:曾志恒 
攝影:傅新發 
部分圖片由被訪者提供