BONI每日的收送貨時間是早上 8點至晚上 11點， Kelvin表示：「我哋設計送貨時間時主要係考慮打工仔嘅作息時間，香港人經常 OT， 9點後訂單最多。」

創業通

創業通

做臥底偷師　搞網上洗衣平台

創業通

做臥底偷師　搞網上洗衣平台

新年後天氣開始回暖，是時候清洗羽絨，準備換季。香港人工作忙碌，未必有時間在家中清洗或拿去洗衣店，令家中待洗衣物堆積如山。 80後的 Kelvin和 Elaine察覺年輕上班族愈來愈習慣 O2O消費模式，故嘗試將科技融入傳統的洗衣業，並親自到洗衣店打工取經，去蕪存菁，成立網上洗衣服務平台 BONI，令洗衣服務更方便、清晰。客人只需在網上落單，便可安坐家中，享受衣物送洗的服務，成功吸引一班年輕上班族客人，改變新一代的洗衣習慣。

採訪當日， Kelvin和 Elaine於早上 8時多便開始上門收取客人的衣物，「我哋嘅客人以二、三十歲嘅單身或夫婦上班族居多，多嚟自沙田、大埔、中環、上環嘅私人屋苑或村屋，收送貨時間係朝早 8點至晚上 11點，通常最忙係早上 9點前及夜晚 9點打後，都係上班族嘅返、放工時間。除咗皮褸、羽絨等難以自行清洗嘅衣物外，客人都會拎衣物及地氈等家具用品畀我哋洗。」

BONI參與了科學園的網動科技創業培育計劃，故 Kelvin（右）和 Elaine（中）可使用園內的 Incu-App中心作辦公室。

15年 11月， Kelvin和 Elaine創立的網上洗衣平台 BONI開始營運，「客人只要喺網站上輸入地址及收貨時間，就可以落單，車隊就會喺指定時間上門收衫，然後送去同我哋合作嘅洗衣店或工場清洗，磅洗最快 24小時完成，乾洗需時 4日，清洗好嘅衣物會按客人預定嘅時間送返原址。我哋暫時同緊位於美孚、荃灣等 4間嘅洗衣店及工場合作；𠵱家亦同物流公司合作，每日繁忙時間係晚上 7點至 11點，約有 20位司機幫我哋送貨。」

洗衣經歷啟發創業

BONI暫時不接受送洗手工精細衣物，如刺繡、釘珠等， Elaine表示：「手工訂造嘅衫細節位太多，清洗工序繁複，通常要獨立報價，加上處理嘅風險大，我哋暫時唔洗呢類衫，避免衣物損毀時造成爭拗。」

近年手機程式或網站開發公司大行其道， Elaine和 Kelvin也是在一間教育網站公司認識，「我同 Kelvin之前係同事，我係負責網頁設計嘅工作， Kelvin屬於營運部門。我哋有時傾開計，發現大家對發展 O2O銷售都特別感興趣，心思思想一齊創業。」
想創業就要鎖定目標， Kelvin因一次乾洗經歷萌生創立網上洗衣平台的念頭，「我有次拎件皮褸去洗衣店乾洗，落單時講好收費係$200，但到我拎衫時要收$240，原因係我漏咗對手套喺衫袋，洗衣店冇通知我就順便洗埋，最後局住要畀埋手套嘅清洗費。除咗有啲不滿外，我亦開始諗網站等科技可能會令洗衣服務更方便、清晰。」

做臥底取經

Kelvin曾當了送貨司機半年，熟習物流運作，平時都會幫手收送貨，「因我唔習慣揸棍波，開車較生疏，當時引起師傅懷疑我係咪做開職業司機。」

15年初， Kelvin和 Elaine辭去工作，着手籌備網上洗衣服務。他們都是洗衣業的門外漢，故親身入行打工汲取經驗， Elaine表示：「我半年內去咗 3間洗衣店及工場打工，發現營運上有好多可以改進嘅地方。我做洗衣店前枱時，發現收費唔清楚，好似某啲牌子嘅衫會收附加費，但佢哋只會報個總數，唔會向客人解釋個價目；收據好少會寫清楚客人嘅送洗項目，到時洗嘅衫唔見咗，真係口同鼻拗。」
既然察覺到傳統洗衣業的不周， Kelvin在設計 BONI的營運程序時便着手改良，「首先收費要清晰，磅洗 10磅$70，其後每磅$7；乾洗則分$50、$90及$120，按衣物嘅種類去劃分，好似羽絨及床單都係一件$120，網站上有列明衣物嘅分類。我哋收完客人袋衫，會將衣物嘅種類、顏色、品牌輸入去系統，客人開番個 account就可以睇到自己送咗咩衫去洗，一目了然，真係漏咗都追得番。」
為了解物流的營運情況， Kelvin亦當了送貨司機半年，「物流公司會將香港劃成 6區，每區設一個散貨嘅 centre去加強效率，我就參考呢個方法去搵合作嘅洗衣工場，港九新界都最少有 1個做 centre；另外，我哋向合作嘅物流公司包咗晚上 8至 11呢 3個鐘，司機會按我設計嘅路線去送貨，而車隊亦分為 3組，平時專門喺某個區域送貨，令服務更加準時。」

洗衣機用到盡

BONI於 15年 8月開始試業，現時合作的洗衣店及工場都是由 Kelvin和 Elaine親自接洽，「其實佢哋都幾樂意合作，除咗離島外，我哋港、九、新界都送貨，可以擴大洗衣店嘅客源，唔受區域限制；同時可以將洗衣機嘅效能用到最盡，下午 2、 3點吉咗出嚟嘅時間，可以洗我哋嘅訂單去填補。」
為了讓更多客人認識 BONI， Kelvin曾試過派傳單洗樓作宣傳，「我哋喺沙田、火碳等屋苑及港鐵站派傳單，專揀收放工嘅時間去派；後嚟就喺 google買關鍵字落廣告，大家只要 serach『網上洗衣』，就會搵到 BONI。」

累積回頭客

另一方面，他們以服務取勝做出口碑，訂單由開業初一星期 10宗，增至現時超過 80單，通常每張單的收費由$100至$300不等。「雖然試過送貨時調轉咗袋衫，但最後都搵得番，我哋都畀咗優惠向客人道歉。我哋有清楚顯示如衣物有損毀，最高賠償金額係原本服務費嘅 5倍，但暫時不收太昂貴嘅衣物，亦未試過出現衣物損毀嘅情況，𠵱家有一半以上都係回頭客。」
隨着生意漸上軌道， Elaine有意向大學生推廣業務，「雖然宿舍可以自助洗衫，但設備唔夠完善，有時洗到一陣味。我哋計劃推出優惠嘅 plan，幫佢哋洗 suit，希望網上洗衣平台更多人知。另外， 3月會出埋 BONI嘅 app，落 order就更加方便。」

BONI　 http://www.boni.com.hk

Frank及 Irene（中天洗衣店負責人）：
由上年 8月 BONI試業，我哋就開始合作到𠵱家。年輕人習慣衣食住行都上網搞掂， BONI正正可以幫我哋接觸鍾意方便又慣用網上服務嘅中產客，𠵱家接多咗乾洗西裝嘅生意。

蕭小姐（客人）：
我平日放工返到屋企已經夜晚 10點，但樓下洗衣店通常 6點就收鋪，同我返放工時間唔夾。後來朋友介紹我用 BONI，上網落 order就有人嚟收衫，又可以約實送貨時間，好方便，𠵱家我每星期都會喺 BONI洗一次衫。

點用網上洗衣平台？

客人在 BONI申請帳號後，在系統輸入收、送貨時間及地址，再選取磅洗或乾洗服務。

車隊會按客人的下單時間，上門收取衣物，然後送到合作的洗衣店。

洗衣店會記錄衣物的重量、品牌、顏色及種類，將資料傳送給 BONI，所有資料最終會顯示在客人的下單紀錄中，客人可在電子帳單中翻查洗衣紀錄。

洗衣店會按訂單要求，清洗衣物，磅洗衣物 6小時後便可交還給 BONI。

車隊會到各洗衣店收取洗好的衣物，並按時送還客人府上。

開業成本
網站開發：$100,000
雜費：$20,000
總投資：$120,000

每月收支
營業額：$93,000
人工(2位老闆)：$8,000
洗衣：$40,000
運輸：$22,000
雜費：$500
盈利：$22,500

撰文：杜曉婷
攝影：陳子禮葉偉豪