Marshall在美國留學多年,練得一手好廚藝,「烹飪係我嘅嗜好,雖然自己去 VTC讀過鐵板燒課程,但始終唔夠專業師傅手腳快,所以開業初期一腳踢真係做唔切啲單,最後請咗 2個師傅主理食物,我負責番鋪頭嘅營運。」

創業通

情侶檔 舊區開親民價鐵板燒

師傅在食客面前即製鐵板燒,並非高級食肆的專利。
80後情侶 Tracy及 Marshall因在深水埗幫家人打理蔬果檔,察覺區內因市區重建出現年輕街坊, 3餸飯、茶記不合其口味,萌生開新式食肆的念頭;後遇上急需頂讓鋪位成 2人創業契機,最終於 15年 12月在區內開設了板上鐵板燒便當。
大眾化價錢就可享受即製鐵板燒便當,經 ig食評網宣傳後,成功吸引附近街坊及年輕情侶支持。

客人坐在玻璃前,一面觀看師傅烹調鐵板燒,一面吃便當,板上的老闆 Tracy表示:「大家講起鐵板燒快餐,可能即時聯想到連鎖快餐店嘅雜扒餐,最多都係自己即場淋上黑椒汁。我哋希望提高快餐嘅質素,鐵板燒便當都係即叫即喺客人面前燒,快餐都可以有鐵板燒專門店嘅享受。」
板上現時供應 6款鐵板燒便當,另有漢堡包、熱狗、日式燒餅等小食,人均消費約$60,設有堂食及外賣, Marshall表示:「鋪頭可以坐 18個人,客人可以外賣自取,買滿$80就可送外賣,暫時只送深水埗區內。平日午餐、晚飯時間最多人,假日由中午 12點幾開始忙,一直做到晚市。平日多數係附近新興建屋苑嘅客人嚟買外賣做晚餐,放假就多年輕家庭客或區外嘅後生情侶嚟食嘢。」

Marshall指在深水埗開食肆,食物分量要夠大,「街坊會形容分量充足嘅飯盒做『似睇』,『似睇』嘅食物就抵食。」

板上在桂林街路口,附近一帶是街市及舊式店鋪,是該區少有的新式裝潢食肆。

採訪時正值晚上 7時,不少年輕上班族及情侶在店內吃晚飯。

店內裝修的最大特色就是客人可隔着玻璃,一面吃便當,一面欣賞師傅烹調鐵板燒。

經營蔬果檔變創業

Tracy和 Marshall在美國讀書時認識成為情侶, 10年回港後, Tracy便在深水埗經營了 5年蔬果檔,「返港後,我做過一段時間文職,但媽媽喺街市經營蔬果檔,每日做十幾個鐘好辛苦,我覺得要盡責任,去菜檔幫佢手。 Marshall本來喺美國打工,但我哋唔想一直分隔兩地,最後佢決定返嚟香港。大家都想作息時間接近啲,佢決定幫我一齊打理蔬果檔。」
2人日夜在深水埗鬧市穿梭,留意到舊區的人口靜靜起變化, Marshall說:「市區重建後多咗唔少中產嘅私人屋苑,開始有年輕上班族嚟買餸。我就諗平時呢班人唔煮飯去邊到食嘢呢?我喺區內食晏通常揀 3餸飯、茶餐廳,冇咩選擇。我有時會同客人傾偈,佢哋指食肆太舊坐得唔舒服,加上自己對烹飪有研究,我同 Tracy提議過喺深水埗開新式食肆,大家都覺得有市場。」
15年中,他們找到頂讓鋪位,成為創業的契機, Tracy說:「媽媽有朋友想搵人頂咗間鋪,我哋一直都計劃開食肆,當時諗既然有鋪不如行動;加上呢度有 600呎,月租 7萬,睇過福榮街同等大細嘅鋪位,要貴至少 1倍,呢度啱我哋嘅預算。」

新菜式 
板上蒲燒鰻魚便當$68
鰻魚便當可選擇配上日式炒麵,與偏甜的醬汁更夾。

新菜式 
黑豚炒麵熱狗$38

新菜式 
板燒鯖魚便當$48
每個便當內皆有兩款前菜,造型比茶餐廳碟頭飯精緻。

熱賣 
板上雪花一口牛$52
食鐵板燒豈能沒有牛肉,一口牛亦是店內最受歡迎的便當。

熱賣 
板上照燒雞便當$42
照燒雞是店內的人氣之選,照燒汁令雞肉味道帶甜,是港人喜歡的味道。

平價吸上班族

選擇開鐵板燒專門店源於 2人在美國的留學經驗, Marshall表示:「以前喺美國,好多華人都鍾意食鐵板燒,製作方法亦相對簡單,我仲去 VTC讀咗 3個月嘅鐵板燒課程,有個基本功,負責烹調食物。另外,呢區消費暫時負擔唔起幾百蚊一個人嘅鐵板燒,我哋就改成便當形式,五、六十蚊配白飯或炒麵,夠飽肚,啱晒上班族買嚟做午、晚餐。」
15年 12月,板上正式開業, Tracy指至今共調整了 3次菜單,「我哋一開始撞過板,本來想口味特別啲,菜色加咗墨西哥辣椒,但香港人唔習慣又酸又辣嘅味道,頭兩個星期反應一般,每日只做到 4、 5千生意。後嚟就邀請朋友幫手,一齊重新設計過餐牌,做番黑椒、照燒等港人食慣嘅口味,推出咗𠵱家最受歡迎嘅一口牛及照燒雞,生意增加咗 1倍,平日生意額都接近 1萬。」

Tracy和 Marshall會定期和師傅檢討板上的餐牌,添加新菜色, Tracy表示:「之前鋪頭有供應美式炸洋蔥,但製作時間要 15分鐘,師傅同我哋反映會拖慢整體出單時間,為咗提高出菜嘅效率,我哋抽起咗呢款食品。」

店內的餐牌採用快餐店的掛牌設計,抬頭一看菜色一目了然。

店內的牆上插畫加入了深水埗唐樓、老字號商店,新舊融合。

網上食評吸區外客

「 HKPLAYNDINE」是人氣 ig食評網站之一,板上的便當在 1月中得到報導後,的確吸引了區外食客來光顧。

現時「吃貨」要搵食,都是依賴網上食評, Marshall指餐廳亦是靠網上食評吸引區外客,「最初街坊見到呢間同舊區環境格格不入嘅鐵板燒,都會好奇入嚟試吓,亦的確有區內新屋苑嘅住客嚟幫襯,但只做街坊生意唔夠。朋友就幫我哋聯絡咗 ig嘅食評家過嚟試食, post上網做宣傳;後來, ig網上雜誌『 HKPLAYNDINE』都過嚟試食出 post,唔少年輕人喺星期六、日都跟住呢啲食評嚟試食,我記得上咗『 HKPLAYNDINE』後嘅星期六,多咗情侶客喺出面等位。」
在港經營食肆, Tracy指要為客人持續帶來新鮮感,「香港同美國唔同,當地賣一款燒雞都可以賣廿幾年。相反,香港餐廳就要成日轉吓餐牌保持新鮮感,我哋會用鐵板燒嘅方法整唔同食材,最近就加咗鯖魚、鰻魚及日式炒麵熱狗,街坊嚟食都可以轉吓新口味。」

郭先生(客人):
今日拍拖行街經過見到呢度裝修幾靚,好似美式型格餐廳,於是入嚟試吓。雞肉便當同漢堡都幾好味,坐得幾舒服,唔會太逼。

Milk(客人):
女朋友睇到 ig嘅食評覺得鐵板燒賣相吸引,我就陪佢一齊嚟試。試咗一口牛便當同漢堡包,熱辣辣,幾大份。

開業成本

租金(2按 1上):$210,000
裝修:$600,000
廚房用具:$200,000
食材:$60,000
總投資額:$1,070,000

每月收支

營業額:$400,000
人工( 2老闆+8名員工):$150,000
租金:$70,000
食材:$120,000
雜費:$20,000
盈利:$40,000

撰文:杜曉婷
攝影:劉宇軒