Alex表示地球是一個會產生方向和大小穩定的天然磁場,稱為地磁場;另一方面,室內場地的電視機、電腦、電線等各種設備均會產生電磁場,兩種磁場數據加起來,令到室內每個位置都有不同的磁場數據,如指紋一樣。《 Walkin》就是利用磁場數據來運作,不用在商場加設裝置,減少操作成本。

青雲路 Premium Position

玩創新 交通工程師研發商場室內導航 app

道路規劃與市民的生活息息相關,在規劃過程中,需要交通顧問公司的專業意見。
擁有 15年交通工程師經驗的 Alex(王銳),在 11年創立交通顧問公司 Axon,為政府及私人機構提供交通顧問服務,包括交通分析,及為電影公司申請封路拍攝等。
最近 Axon更自家開發了商場室內導航手機程式《 Walkin》,旅客可以在商場內快速找到想去的店鋪,他希望透過科技,讓市民享受到更方便快捷的服務。

現時大型商場林立,佔地極廣, Alex表示手機 app《 Walkin》能幫助市民更快在商場內找到想去的地方,「𠵱家嘅商場愈起愈大,有時要喺商場內搵鋪頭或與朋友會合都唔係咁易。我哋個 app係利用磁場定位,同時收集商場各店鋪嘅資料,可以導航到想去嘅店鋪; app內另有尋找朋友嘅功能,方便喺商場內與朋友會合。」
《 Walkin》是由 Axon公司開發,而 Axon是一間交通顧問公司,創辦人兼交通工程師 Alex表示較少人認識他們的工作,「只要有關道路及運輸嘅工程,我哋都會涉獵到,例如政府要起新嘅道路,會搵我哋畀建議,提交規劃藍圖及可行性研究等;如果發展商有新嘅發展項目,我哋會提交有關發展項目嘅交通影響評估研究,畀政府審批,我哋都有參與港珠澳大橋、三跑、 Red Bull飛行賽當中嘅交通規劃。」

程式收集商場內不同店鋪的資訊及優惠資料,方使用戶查閱。

現時《 Walkin》有商戶資訊、地圖、定位導航及尋找朋友等功能。

導航系統可以在市民選好想到的位置後,提供一條最快去到目的地的路線。

《 Walkin》以九龍灣的 MegaBox作首個試點,用戶進入地圖界面,開啟定位功能後,便會自動偵測用戶在商場內的位置。

擔任交通工程師

在香港大學修讀土木工程學士及運輸工程碩士的 Alex,在 96年畢業後,投身較為冷門的交通顧問公司擔任交通工程師,「我對車輛及道路較有興趣,工作上主要為政府及私人構構,提供點樣起道路嘅建議,有需要時會出去道路統計路段經過嘅車及人,加上其他資訊,畫出道路藍圖及建議文件,令道路配合到城市嘅發展。」
Alex相繼在不同的交通顧問公司工作, 11年,他卻遇上公司裁員,決定自立門戶,「喺呢行做咗十幾年,就諗不如開公司自己接生意。初時只係 home office去接 job,憑住我嘅經驗,及一路以嚟嘅工作都完成得唔錯,令公司有唔錯嘅發展。」 Alex表示合作項目收費由數萬至數百萬元都有。

成立了自家公司 Axon後, Alex不時需要與員工開會,了解工作進度。

擁有十多年交通工程師經驗的 Alex,平時會向新員工分享自己的經驗,讓他們可以順利完成工作。

早前上映的電影《攻殼機動隊》,有些場景是在香港取景,當中也有找 Axon負責向政府申請封路拍攝。

拍電影申請封路

13年, Alex更開拓與電影公司合作的業務,「過往電影公司喺香港取景要封路,有啲會偷雞拍,有啲會自己交份簡單嘅計劃書向政府申請,但隨住有好多市民投訴,政府開始要求要由交通顧問公司申請封路。當時有個荷里活電影公司嘅中間人搵我,話要開拍《黑客特攻》(《 Blackhat》),想封咗干諾道中取景。我要了解會拍乜嘢鏡頭,計算邊個時段封路對交通影響最少,仲要提出封路後嘅交通安排建議,然後向運輸署申請,最後成功申請喺凌晨時分封路拍攝。因為第一次做,我亦有到現場監督情況,大約拍咗 5日戲。」
自此, Axon的名字在電影界的圈子中傳遞出去,《變形金剛:殲滅世紀》、《攻殼機動隊》、《拆彈專家》及《人造天劫》等需要封路取景的荷里活及香港電影拍攝, Axon亦有參與其中。

商場 app成本高

Alex自言是一個愛創新的人, 15年,他決定開發有關商場的室內導航手機程式,「我哋工作主要係畀意見,但我想整實質嘅嘢出嚟,喺研究途中先發現有好多困難。室內導航技術唔係新嘢,但就要喺商場安裝好多硬件去定位,令到成本高昂及複雜,最後我搵到一間芬蘭公司開發嘅磁場定位技術,再同一間法國公司合作開發導航部分。」
用了約兩年時間, Axon將《 Walkin》開發成功, Alex表示預計程式在 10月及 11月相繼在 Android及 iOS平台上架,「早前我哋嘅同事用咗兩個幾月時間收集 MegaBox嘅磁場數據,測試咗 app係可行嘅。有咗經驗後,𠵱家約 1星期就可以將一個商場嘅數據收集好,嚟緊 1年內會陸續增加 20個商場,目前亦有商場接觸我哋傾合作,有佢哋嘅配合下,我哋可以更快去完善資料庫,令市民有更好嘅體驗。」

要收集商場的磁場數據, Alex需要派員工拿着安裝了特定程式的手機,到現場來回走動以收集數據,「每一寸地方都要行,數據先會完整;另外店鋪唔同咗,電磁場都會改變,所以每隔 1、 2個月就要做一次數據收集,以保持程式準確。」

點入行?

對有興趣加入交通顧問公司的人士, Alex表示修讀相關的課程會具有一定優勢,「交通顧問公司需要工程師及規劃師,首先對交通道路有興趣,讀土木工程或地理系會比較有利。喺面試時,我會留意應徵者有冇學習嘅心態,同時亦要識得同人合作,交通規劃師初入職月薪約$12,000至$18,000。」

撰文:曾志恒
攝影:林文樂
部分圖片由被訪者提供